Þjónustukönnun heilsugæslustöðva á höfuðborgarsvæðinu

21.2.2020

Könnunin var gerð af Maskínu fyrir Sjúkratryggingar Íslands (SÍ) en kannanir sem þessar eru liður í eftirliti SÍ með þjónustu sem veitt er á grundvelli samninga við stofnunina. Niðurstöðurnar hafa þegar verið kynntar rekstraraðilum og verða nýttar bæði af SÍ og einstökum þjónustuveitendum til að þróa og efla þjónustuna. 

Slembiúrtak var gert meðal þeirra sem sótt höfðu heilsugæslustöðvar á höfuðborgarsvæðinu á tímabilinu janúar-október árið 2019 en alls tóku 5.983 einstaklingar þátt í könnunni, um 300 frá hverri heilsugæslustöð.

Helstu niðurstöður könnunarinnar eru þær að almennt bera einstaklingar mikið traust til heilsugæslunnar eða 74% aðspurðra og 79% eru ánægðir með þjónustuna. 90% svarenda töldu viðmót og framkomu starfsfólks almennt gott. Rúmlega helmingur einstaklinga sögðust hafa fengið tíma við hæfi en um 65% telja það brýnt að stytta bið eftir þjónustu hjá heilsugæslunni almennt. Um 50% telja mikilvægt að auðvelda aðgengi að læknum í síma og tæp 40% vilja auka rafræna þjónustu.

Þegar niðurstöður eru bornar saman milli heilsugæslustöðva sýna sjö heilsugæslustöðvar bestan árangur í flestum spurningum. Það eru Heilsugæslustöðvarnar Höfða, Salahverfi, Lágmúla, Efstaleiti, Seltjarnarnesi, Urðarhvarfi og Árbæ.

Hafa verður í huga við samanburð á milli stöðva að ýmislegt getur haft áhrif á þjónustu stöðvarinnar á því tímabili sem er skoðað, eins og t.d. mannekla, álag og starfsmannaskipti.

SÍ telja þessa könnun veita verðmætar upplýsingar um það sem vel er gert og það sem betur má fara hjá einstökum heilsugæslustöðvum. Gögnin eru mikilvæg verkfæri fyrir bæði SÍ og heilsugæslustöðvar til að þróa og bæta þjónustuna enn frekar.

Hægt er að skoða frekari niðurstöður könnunarinnar með því að smella á hlekkinn hér að neðan:
https://www.maskina.is/maelabord/heilsugaesla/

Til baka

 


Language:

Þetta vefsvæði byggir á Eplica