Sjúkratryggingar Íslands og Stafrænt Ísland þróa stafræna umsókn um sjúkratryggingu í gegnum island.is

2.7.2021

  • SÍ lógó

Þeir sem þurfa á sjúkratryggingu að halda geta nú sótt um hana hjá Sjúkratryggingum Íslands í gegnum nýtt umsóknarkerfi island.is. Umsókn um sjúkratryggingu er fyrsta umsóknin í nýja kerfinu en það hefur verið í smíðum undanfarin misseri og einfaldar alla vinnslu bæði fyrir móttakanda sem og umsækjendur.

Notkunarmöguleikar island.is hafa verið styrktir á síðustu mánuðum og má þar nefna umsóknarkerfi, innskráningarkerfi, umboðskerfi og „Mínar síður“. Öll þróun héðan í frá mun eiga sér stað á grundvelli þeirra. Þessar nýju lausnir spara almenningi og opinberum stofnunum fé og fyrirhöfn og munu opinberar stofnanir geta innleitt þær á næstu vikum.

„Það er frábært að fá Sjúkratryggingar Íslands í hóp samstarfsaðila okkar. Það hefur verið frábært að vinna með þeim og styrkur í að fá þau með í þá þróun sem hefur átt sér stað. Þessi breyting mun styrkja bæði þjónustu Sjúkratrygginga Íslands sem og vonandi upplifun þeirra sem þangað sækja. Við hlökkum til að vinna áfram með þeim.“

Andri Heiðar Kristinsson framkvæmdastjóri Stafræns Íslands.

„Þetta verkefni er liður í að bæta þjónustu okkar við notendur og jafnframt einfalda okkar vinnuferla. Við hófum samstarfið við Stafrænt Ísland með umsókn um sjúkratryggingu. Þegar er hafin vinna við næsta verkefni sem er tilkynning um slys. Fjöldi annarra umsókna er svo á teikniborðinu.“

María Heimisdóttir forstjóri Sjúkratrygginga Íslands.

Umsókn um sjúkratryggingu á við um þá sem eru að flytja til Íslands frá öðru landi innan evrópska efnahagssvæðisins, Grænlandi eða Færeyjum til að kanna réttindastöðu sína. Nánari upplýsingar um umsókn um sjúkratryggingu má finna á island.is undir https://island.is/umsokn-um-sjukratryggingu

Margar nýjar umsóknir eru á leið inn í nýja umsóknarkerfið frá hinum ýmsu stofnunum eins og umsókn um fæðingarorlof.

Til baka

 


Language:

Þetta vefsvæði byggir á Eplica