Yfirlýsing Landspítala og Sjúkratrygginga Íslands vegna fjölmiðlaumfjöllunar tengda nýjum rammasamningi um kaup á þvagvörum og þvagleggjum

14.12.2018

Þann 1. nóvember sl. tók gildi nýr samningur um þvagleggi og þvagvörur, í kjölfar sameignlegs útboðs Landspítala og SÍ. Borið hefur á gagnrýni á niðurstöðu útboðsins og því hefur verið haldið fram að ástæða breytinga á vöruúrvali sé eingöngu sparnaður og að notendur hafi ekki kost á nægjanlega góðum þvagleggjum af ákveðinni gerð sem kallast aftöppunarþvagleggir.

Í útboðsgögnum koma m.a. fram þær kröfur sem gerðar eru til þeirra vara sem boðnar eru út, hvernig kaupandi mun meta vöruna, bera saman tilboð og vægi verðs og gæða. Við opnun tilboða hjá Ríkiskaupum kom í ljós að þrjú gild tilboð bárust í vöruflokkinn aftöppunarþvagleggir. Fagfólk á þessu sérsviði prófuðu vörur samkvæmt öllum gildum tilboðum og gáfu þeim umsögn. Niðurstaðan var að taka tilboðum tveggja bjóðenda í þessum vöruflokki. Í því vöruúrvali eru vörur sem eru notaðar um heim allan og eru hannaðar og framleiddar í samræmi við allar gæðakröfur sem gerðar eru til þvagleggja í dag, sjá medor.is

Umræðan hefur snúist um að SÍ hafi tekið ákveðnar vörur út úr rammasamningi. Hið rétta er að ekki barst gilt tilboð um umræddar vörur og samkvæmt lögum um opinber innkaup er kaupanda óheimilt að semja um aðrar vörur en þær sem boðnar eru með gildu tilboði.

Landspítali og SÍ harma þann misskilning sem einkennt hefur umræðuna og hvetja til upplýstrar umfjöllunar sem skapar hvorki ótta né óöryggi hjá notendum.

 

María Heimisdóttir, forstjóri Sjúkratrygginga Íslands

Rúnar Bjarni Jóhannsson, framkvæmdarstjóri fjármálasviðs Landspítala

Til baka

 


Language:

Þetta vefsvæði byggir á Eplica