Aðgerðir gegn misnotkun á ritalini

2.9.2010

  • Skjaldamerki Íslands

Í frétt á vef heilbrigðisráðuneytisins kemur fram að skipaður hefur verið vinnuhópur til að skipuleggja aðgerðir til að draga úr ofnotkun og koma í veg fyrir misnotkun á methýlphenídati, sem birtist umfram allt í mikilli notkun á Ritalini og Ritalin Uno.

Í fréttabréfi Lyfjadeildar Sjúkratrygginga Íslands  sem kom út þann 18. ágúst sl. var vakið máls á að kostnaður sjúkratrygginga á þessu ári vegna lyfja (methýlphenídati) við ADHD stefnir í að þrefaldast frá árinu 2006 en athygli vekur að mikil aukning er á notkun lyfsins hjá fullorðnum. Notkun lyfja við ADHD er einnig talsvert meiri hér á landi en annars staðar á Norðurlöndum.

Samkvæmt frétt heilbrigðisráðuneytis hefur Landlæknisembættinu, Lyfjastofnun og Sjúkratryggingum Íslands verið falið að grípa strax til aðgerða til að herða eftirlit með ávísunum og takmarka afgreiðslu þessara lyfja við þann hóp sem sannanlega þarf á lyfjunum að halda.

Vinnuhópnum er ætlaður 2ja mánaða tími til að endurskipuleggja alla meðferð lyfjaflokksins, þ.m.t. endurskoðun á klínískum leiðbeiningum og aðrar þær aðgerðir sem hópurinn telur nauðsynlegar. Jafnframt er vinnuhópnum falið að tryggja að þeir sem þurfa á meðferð með þessum lyfjum að halda skaðist ekki, en það eru einkum börn og ungmenni upp að 20 eða 22ja ára aldri.

 Hópinn skipa eftirtaldir:

 Einar Magnússon, skrifstofustjóri á lyfjaskrifstofu heilbrigðisráðuneytisins, formaður

 Geir Gunnlaugsson, landlæknir

 Guðrún I. Gylfadóttir, deildarstjóri lyfjadeildar Sjúkratrygginga Íslands

 Jóhann M. Lenharðsson, lyfjafræðingur Lyfjastofnunar

Meðal verkefna hópsins er:

  • Hert eftirlit  með ávísunum lækna á methýlphenídat
  • Endurskoðun á vinnureglum um ávísanir á methýlphenídat, þar sem þröngar skorður eru settar við ávísunum til einstaklinga yfir 20 ára aldri
  • Að skoða hvort hægt sé að taka aftur upp svokölluð „gul kort“, sem áður voru forsenda þess að einstaklingar fengju ávísað amfetamínskyldum lyfjum
  • Skylt verði að tilkynna til landlæknis um einstaklinga sem taldir eru misnota methýlphenídat.

Ráðuneytið ítrekar að aðgerðum þessum er ekki ætlað að beinast gegn þeim sem á þessum lyfjum þurfa að halda – sérstaklega börnum og ungmennum. Í því skyni hefur ráðuneytið haft samráð við Geðlæknafélag Íslands og stjórn ADHD-samtakanna, sem leiddi m.a. til þess að ákveðið var að miða við 20 ára aldur. Aðgerðirnar eiga því í engu að skerða aðgengi barna og ungmenna að nauðsynlegum lyfjum, heldur beinast að mögulegri mis- og ofnotkun fullorðinna.

Tekið af vef heilbrigðisráðuneytisins og vef Sjúkratrygginga Íslands

Til baka

 


Language:

Þetta vefsvæði byggir á Eplica