Heilbrigðisþjónusta erlendis á tímum Covid-19

11.2.2021

Síðastliðna mánuði hafa Sjúkratryggingar Íslands frestað greiðsluþátttöku vegna heilbrigðisþjónustu erlendis sem ekki telst lífsbjargandi. Þetta er gert vegna mikillar óvissu í heiminum vegna Covid-19 og var ákvörðunin tekin að höfðu samráði við landlækni og sóttvarnarlækni. Meginreglan er því sú að stofnunin mun ekki gefa út greiðsluábyrgðir vegna slíkrar þjónustu fyrr en áhætta telst ásættanleg, í samræmi við leiðbeiningar sóttvarnayfirvalda. Rétt er að taka fram að umsóknir sem berast eru afgreiddar áfram þó ekki sé hægt að samþykkja ferð á þeim tíma sem sótt er um.

Þeir einstaklingar sem fengu samþykkta greiðsluþátttöku í kostnaði vegna meðferðar erlendis áður en heimsfaraldur Covid-19 hófst falla einnig hér undir og verða almennt ekki gefnar út greiðsluábyrgðir til flugfélaga vegna þeirra fyrr en áhætta telst ásættanleg.

Þrátt fyrir framangreinda meginreglu er hvert og eitt mál skoðað sérstaklega. Auk læknisfræðilegs ástands sjúklings er horft til nýgengis sýkinga á því svæði sem sjúklingur hyggst fara til, sjá: https://www.ecdc.europa.eu/en/cases-2019-ncov-eueea og https://covid19-country-overviews.ecdc.europa.eu/ .

Ákveði einstaklingur, þrátt fyrir framangreint, að ferðast erlendis til þess að sækja heilbrigðisþjónustu sem krefst fyrirfram samþykkis SÍ, fellur allur kostnaður á viðkomandi og greiðsluþátttaka af hálfu SÍ verður engin. Einnig er vert að benda á að SÍ er ekki heimilt að taka þátt í kostnaði vegna mögulegrar sóttkvíar, hvorki erlendis né hér á landi.

Þessi framkvæmd, sem komið var á með öryggi einstakra sjúklinga, öryggi heilbrigðiskerfis landsins og íslensks samfélags í huga, verður endurskoðuð reglulega.

Til baka

 


Language:

Þetta vefsvæði byggir á Eplica