Hverjir geta átt rétt á bótum úr sjúklingatryggingu?
Þeir sjúklingar sem verða fyrir líkamlegu eða geðrænu tjóni í tengslum við rannsókn eða sjúkdómsmeðferð. Einnig þeir sem missa framfæranda við andlát slíkra sjúklinga.
Einnig eru tryggðir þeir sem gangast undir læknisfræðilega tilraun sem er ekki liður í sjúkdómsgreiningu eða meðferð á sjúkdómi einstaklingsins. Einnig þeir sem gefa vef, líffæri, blóð eða annan líkamsvökva.
Sérstök athygli er vakin á því að sjúklingatrygging bætir ekki heilsutjón sem er afleiðing lyfjameðferðar nema umrætt lyf hafi ekki verið gefið á réttan hátt eða það hefði verið unnt að beita annarri meðferðaraðferð.
Hvar eru sjúklingar tryggðir?
Sjúkratryggingar Íslands afgreiða umsóknir um bætur um sjúklingatryggingu vegna tjóns sem verður:
- á heilsugæslustöðvum, sjúkrahúsum og öðrum heilbrigðisstofnunum sem ríkið á í heild eða að hluta.
- í sjúkraflutningum
- á heilbrigðisstofnunum erlendis þegar sjúklingur er þar á vegum Sjúkratrygginga ef ekki fást fullar bætur í viðkomandi ríki.
Ef heilsutjón verður á öðrum stöðum þarf sjúklingur að beina umsókn til vátryggingafélags viðkomandi stofnunar eða heilbrigðisstarfsmanns.
