Flutningur til Íslands

Einstaklingar sem flytja frá EES landi eða Sviss og hafa verið tryggðir í almannatryggingakerfi í fyrra búsetulandi eiga rétt á því að vera sjúkratryggðir frá og með þeim degi þegar lögheimili er skráð. Athugið að skila verður inn umsókn um sjúkratryggingu, sjá hér til hægri, til að geta fengið sjúkratryggingu frá skráningu í Þjóðskrá. 

Mikilvægt er að hafa í huga að það tekur tíma að fá svör frá fyrra tryggingalandi og því eru einstaklingar sjúkratryggðir afturvirkt þegar svar hefur borist frá fyrra tryggingalandi. (Getur tekið allt að 6 mánuðum) sjá ferli hér að neðan. 

Ef einstaklingar voru ekki tryggðir eða voru eingöngu með einkatryggingar í fyrra búsetulandi verða þeir að bíða í sex mánuði eftir sjúkratryggingu. Sama gildir um þá sem flytja frá landi utan EES. 

Ávallt er miðað við dagsetningu lögheimilisskráningar.

Þegar umsókn um sjúkratryggingu hefur borist Alþjóðadeild Sjúkratrygginga Íslands, er send fyrirspurn til fyrra búsetulands og óskað eftir staðfestingu á fyrra tryggingartímabil, E-104/S041 vottorð. Ef einstaklingur skilar sjálfur inn E-104 vottorði flýtir það fyrir afgreiðslu málsins (flestar stofnanir hættar að gefa vottorðið út til einstaklinga).

Á meðan umsókn er í vinnslu eru einstaklingar ósjúkratryggðir. Þurfi þeir á læknisþjónustu að halda á vinnslutíma umsóknar geta þeir framvísað evrópska sjúkratryggingakortinu frá fyrra búsetulandi, hafi þeir slík kort, og þá greitt sem sjúkratryggðir, eða greitt sem ósjúkratryggðir og sótt um endurgreiðslu hjá Sjúkratryggingum Íslands þegar búið er að samþykkja afturvirka sjúkratryggingu og þá þarf að senda inn umsókn um endurgreiðslu á innlendum sjúkrakostnaði, sjá hér til hægri ásamt reikningum og greiðslustaðfestingu á laeknareikningar@sjukra.is

Einstaklingar sem flytja á milli landa bera ábyrgð á því að skráning þeirra sé rétt hjá viðkomandi yfirvöldum.

Sérreglur varðandi flutning til Íslands

Einstaklingar sem eru að flytja aftur til Íslands frá Norðurlöndunum innan 12 mánaða verða sjálfkrafa sjúkratryggðir við lögheimilisskráningu í Þjóðskrá, ekki þörf á að skila inn umsókn um sjúkratryggingu. 

Námsmenn sem flytja aftur til Íslands innan sex mánaða frá námslokum geta skilað inn staðfestingu á námi ásamt umsókn um sjúkratryggingu til að verða tryggðir frá og með þeim degi þegar lögheimili er skráð, sjá umsókn til hægri. 

Gagnlegar upplýsingar um flutninga milli Norðurlanda má finna á vefsíðunni Info Norden


Til baka

 


Language:

Þetta vefsvæði byggir á Eplica