Sex og sjö ára börn falla undir samning um gjaldfrjálsar tannlækningar barna frá 1. janúar 2016.

22.12.2015

Þann 1.  janúar næstkomandi bætast sex og sjö ára börn í hóp þeirra sem falla undir gjaldfrjálsar tannlækningar barna skv. samningi Sjúkratrygginga Íslands (SÍ) og tannlækna frá árinu 2013.  Samningurinn tekur þá til allra barna á aldrinum 6 – 17 ára og að auki til 3 ára barna.

Skilyrði fyrir því að barn eigi rétt á gjaldfrjálsum tannlækningum er að barnið hafi verið skráð hjá heimilistannlækni með samning við Sjúkratryggingar Íslands.

Þann 15. desember sl. höfðu 55.555 börn verið skráð með heimilistannlækni.  Af þeim falla 42.372 börn undir samninginn.  Þess má geta að samkvæmt Hagstofu Íslands voru 80.006 börn, yngri en 18 ára, búsett á Íslandi 1. desember s.l.  Þar af eru 32.303 börn sem enn falla ekki undir samninginn vegna aldurs.  Heimtur hafa því verið góðar og hafa hæst farið yfir 96% í einum árgangi.

Tannheilsa íslenskra barna hefur batnað umtalsvert á liðnum árum.  Árið 2001 náði greiðsluþátttaka sjúkratrygginga t.d. til 74.663 tannviðgerða í börnum 17 ára og yngri. Það ár fékk hvert barn 1,57 viðgerð í tönn að meðaltali.  Árið 2013 hafði viðgerðum greiddum af sjúkratryggingunum vegna barna fækkað um 58% í 31.013. Að meðaltali fékk hvert barn sem kom til tannlæknis og fékk greiðslu frá SÍ það ár 0,67 viðgerð í tönn, en ríflega 70% barnanna þurftu enga viðgerð.

 Eins og við var að búast hefur viðgerðum í tennur barna fjölgað lítillega eftir gildistöku samningsins. Ástæðan er sú að með samningnum er eftirlit með tannheilsu barna eflt og engin börn eiga að þurfa að fresta nauðsynlegri meðferð vegna kostnaðar. Sú uppsafnaða þörf, sem var fyrir hendi, verður ekki lengur til staðar eftir innleiðingu samningsins. Því má nú búast við fækkun tannviðgerða á ný, en samningurinn gildir til ársins 2019.

Fjoldibarna            

Til baka

 


Language:

Þetta vefsvæði byggir á Eplica