Nýtt greiðsluþátttökukerfi vegna lyfjakaupa  tekur gildi 4. maí

11.4.2013

Sjúkratryggingar Íslands taka upp nýtt greiðsluþátttökukerfi vegna lyfjakaupa   4. maí nk. Nýja greiðsluþátttökukerfið byggir á lögum frá Alþingi sem samþykkt voru 1. júní 2012 og hefur kerfið nú verið endanlega útfært með reglugerð frá Velferðaráðuneytinu sem gefin var út 8. apríl sl.  Markmiðið með nýja kerfinu er að auka  jafnræði milli einstaklinga óháð sjúkdómum og tryggja að lyfjakostnaður lækki hlutfallslega mest hjá þeim sem þurfa að nota mikið af lyfjum.

Aukið jafnræði og þak á kostnaði

Það sem einkennir núgildandi greiðsluþátttökukerfi er að kostnaður þeirra sem nota lyf að staðaldri og þurfa á mörgum lyfjum að halda, getur orðið mjög hár vegna þess að ekki er hámark á lyfjakostnaði einstaklinga. Þá er greiðsluþátttaka Sjúkratrygginga Íslands (SÍ) mismikil eftir lyfjaflokkum sem getur skapað ójafnræði milli einstaklinga með mismunandi sjúkdóma.

Ávinningur nýja kerfisins er meðal annars:

  • Jafnræði einstaklinga eykst.
  • Komið er til móts við þá sem hafa mikil útgjöld vegna lyfja.
  • Kerfið er einfaldara en eldra kerfi.

Nýja kerfið byggir á þrepaskiptri greiðsluþátttöku þar sem hver einstaklingur greiðir hlutfallslega minna eftir því sem lyfjakostnaður hans eykst innan tólf mánaða tímabils. Í fyrsta þrepi greiðir einstaklingurinn lyf að fullu, í öðru þrepi greiðir hann 15% af verði lyfja og í þriðja þrepi greiðir hann 7,5%. Öll lyf sem SÍ taka þátt í að greiða (þar með talin lyf sem einstaklingur hefur fengið samþykkt lyfjaskírteini fyrir) verða felld inn í greiðsluþrepin. Þau lyf sem SÍ taka ekki þátt í að greiða, falla utan greiðsluþrepanna. Þegar lyfjakostnaður hefur náð ákveðnu hámarki getur læknir sótt um að SÍ greiði lyf að fullu það sem eftir er af tímabilinu að uppfylltum tilteknum skilyrðum.

Þeir sem hafa haft mikinn lyfjakostnað greiða því almennt minna fyrir lyf í nýju kerfi. Þeir sem þurfa sjaldan að kaupa lyf munu almennt greiða meira en áður.

Tólf mánaða greiðslutímabilið hefst við fyrstu lyfjakaup einstaklingsins. Ef hann kaupir t.d. lyf í fyrsta sinn 15. maí 2013 þá lýkur tímabilinu 15. maí 2014. Nýtt tímabil hefst þegar viðkomandi kaupir lyf í fyrsta sinn eftir að framangreindu tímabili lýkur.

Áður niðurgreidd lyf munu falla inn í kerfið

Lyf  sem hafa verið niðurgreidd að fullu í núverandi kerfi eru lyf sem hafa svokallaða stjörnumerkingu í lyfjaverðskrá t.d. glákulyf, sykursýkilyf og krabbameinslyf. Einnig hafa einstaklingar með parkinson, flogaveiki og Sjögren ekki greitt fyrir lyf sín ef þeir hafa fengið útgefið lyfjaskírteini. Þessi lyf verða felld inn í kerfið og einstaklingar taka þátt í kostnaði þeirra  skv. nýja kerfinu.

Lyfjareiknivél reiknar út lyfjakostnað

Nú er aðgengileg lyfjareiknivél þar sem hægt er að reikna lyfjakostnað út frá gefnum forsendum. Þeir sem vilja skoða hvernig lyfjakostnaður þróast í nýju kerfi eru hvattir til að kynna sér reiknivélina.

Hægt verður að skoða stöðu sína í Réttindagátt

í Réttindagátt - þjónustusíðu einstaklinga á www.sjukra.is verður hægt að sjá í hvaða greiðsluþrepi einstaklingur er staddur hverju sinni og yfirlit yfir lyfjakaup eftir að nýtt kerfi tekur gildi.  Innskráning fer fram með rafrænum skilríkjum, íslykli island.is eða veflykli skattyfirvalda.

Úrræði vegna lyfjaútgjalda

Í ákveðnum tilfellum er hægt að óska eftir því við apótek að fá lyf afgreidd í minni skömmtum. Til dæmis geta apótek afgreitt eins mánaðar skammt í einu þrátt fyrir að lyfseðill sé gefinn út fyrir þriggja mánaða skammti.

Læknir getur sótt um lyfjaskírteini, að uppfylltum ákveðnum skilyrðum, vegna lyfja sem hafa almennt ekki greiðsluþátttöku SÍ. Sjá upplýsingar um lyfjaskírteini.

Einstaklingar sem hafa orðið fyrir miklum útgjöldum vegna læknishjálpar, lyfja eða þjálfunar geta átt rétt á endurgreiðslu á hluta kostnaðar hjá Tryggingastofnun ríkisins (TR). Reglugerð vegna þessa var breytt nú í vikunni og munu endurgreiðslur hækka. Sjá upplýsingar á vef TR.

Upplýsingar

Hægt er að nálgast upplýsingabækling um greiðsluþátttökukerfi vegna kaupa á lyfjum hér

Nánari upplýsingar:

Til baka

 


Language:

Þetta vefsvæði byggir á Eplica