Nýjar reglugerðir um tannlækningar og brýna læknismeðferð erlendis
Heilbrigðisráðherra hefur undirritað tvær reglugerðir, annars vegar reglugerð um þátttöku sjúkratrygginga í kostnaði við tannlækningar og hins vegar reglugerð um brýna læknismeðferð erlendis. Markmiðið er að einfalda og samræma eldri reglugerðir.
Reglugerð um þátttöku sjúkratrygginga í kostnaði vegna tannlækninga tekur gildi 15. september nk. en reglugerð um brýna læknismeðferð erlendis tekur gildi við birtingu í Stjórnartíðindum. Þær munu fljótlega birtast í Stjórnartíðindum.
Ítarefni (tekið af vef heilbrigðisráðuneytis):
Reglugerð um þátttöku sjúkratrygginga í kostnaði við tannlækningar
Helsta breytingin sem reglugerðin hefur í för með sér er einföldun, þar sem ein reglugerð mun gilda á þessu sviði í stað fjögurra áður. Réttindi sjúkratryggðra verða að mestu óbreytt en þó eru gerðar ákveðnar breytingar, svo sem að miðað sé við tennur framan við endajaxla í stað tólfárajaxla og að ekki þurfi að sækja sérstaklega um fóðrun blóðgóma. Þá er í reglugerðinni kveðið á um styrkveitingu sjúkratrygginga vegna kostnaðar við almennar tannréttingar og um gjaldskrá Sjúkratrygginga Íslands þegar samningar við tannlækna eru ekki fyrir hendi.
Reglugerð um brýna læknismeðferð erlendis
Reglugerðin kemur í stað þriggja eldri reglugerða um brýna læknismeðferð erlendis þegar ekki er unnt að veita nauðsynlega aðstoð hér á landi, sem og um ferðastyrki vegna meðferðarinnar.
Í reglugerðinni er kveðið á um skilyrði fyrir greiðsluþátttöku í brýnni læknismeðferð erlendis þegar ekki er unnt að veita nauðsynlega aðstoð hér á landi. Í slíkum tilfellum greiða Sjúkratryggingar Íslands kostnað við meðferðina, en skilyrði er að meðferðin sé alþjóðlega viðurkennd og byggist á gagnreyndri þekkingu á sviði læknisfræði.
Þá eru settar reglur um málsmeðferð og val á meðferðarstað, auk reglna um komu sérgreinalækna til landsins. Einnig er kveðið á um greiðslu ferðastyrks, þ.e. fargjalds og dagpeninga, og skilyrði fyrir greiðslu ferðastyrks til fylgdarmanna.
Loks eru í reglugerðinni sérákvæði um sérstakt sjúkraflug og tæknifrjóvgun erlendis.
