Vinnuslys

Öll slys þarf að tilkynna innan eins árs. Mikilvægt er að tilkynningar séu rétt útfylltar og í frumriti.

Skilyrði er að viðkomandi hafi fengið greidd laun vegna vinnunnar eða ef um sjálfstæðan atvinnurekanda er að ræða þá reiknað endurgjald.

Þegar slys ber að höndum og ætla má að það sé bótaskylt skal það tilkynnt til þjónustumiðstöðvar Sjúkratrygginga og Tryggingastofnunar á Laugavegi 114, Reykjavík eða til umboða hennar úti á landi.

Með tilkynningu um slys þarf að fylgja læknisvottorð vegna slyss (áverkavottorð) frá fyrsta lækni sem leitað var til eftir slys.

Önnur fylgiskjöl:

• Lögregluskýrsla eða tilkynning um tjón ef um umferðaslys er að ræða
  

• Skýrsla vinnueftirlits ef um vinnuslys er að ræða

• Læknisvottorð vegna slyss (áverkavottorð)

• Kvittanir/reikningar vegna útlagðs sjúkrakostnaðar

• Vottorð sýslumanns ef um banaslys er að ræða

Hvenær telst maður vera við vinnu?

• Þegar viðkomandi er á vinnustað á þeim tíma sem honum er ætlað að vera að störfum, svo og í matar- og kaffitímum.
• Í sendiferðum í þágu atvinnurekstrar eða í nauðsynlegum ferðum til og frá vinnu. Hér er aðeins um að ræða ferðir sem farnar eru samdægurs milli vinnustaðar og heimilis eða matstaðar. Það sama gildir um lengri ferðir af þessu tagi, ef starfsmaður er á launum hjá vinnuveitanda í ferðinni.

Strangt tekið á reglum um slys

Sem dæmi má nefna að maður sem er á leið til vinnu en fer í banka á leiðinni er ekki tryggður samkvæmt almannatryggingalögum, verði hann fyrir slysi.

Um tilkynningaskyldu

Hinum slasaða, eða öðrum sem vilja gera kröfu til bóta ber að fylgjast með því að tilkynningaskyldu sé fullnægt. Leita má aðstoðar lögreglu ef atvinnurekandi vanrækir að tilkynna um slysið.

• Næsta skref Eyðublað Tilkynning um slys - önnur en sjóslys