Slys við heimilisstörf

Þeir sem fylla út viðeigandi reit á skattframtali í byrjun árs teljast slysatryggðir við heimilisstörf.

Þá er hakað við reitinn „slysatrygging við heimilisstörf“.

Slysatryggingin gildir frá 1. ágúst það ár sem skattframtali er skilað og gildir til 31. júlí árið eftir. Ekki er unnt að óska eftir slysatryggingu við heimilisstörf eftir að skattyfirvöld hafa móttekið skattskýrslu.

Öll slys þarf að tilkynna innan eins árs. Mikilvægt er að tilkynningar séu rétt útfylltar og í frumriti.

Með tilkynningu um slys þarf að fylgja læknisvottorð vegna slyss (áverkavottorð) frá fyrsta lækni sem leitað var til eftir slys.

Slysatryggingin nær til heimilisstarfa sem innt eru af hendi hér á landi:

Á heimili hins tryggða og í sumarbústað þar sem hinn tryggði dvelur.
Í bílskúr og geymslum við heimili hins tryggða eða sumarbústað þar sem hann dvelur.
Í afmörkuðum garði og innkeyrslu við heimili hins tryggða eða sumarbústað þar sem hann dvelur.

Til heimilisstarfa sem falla undir slysatryggingu teljast m.a. eftirtalin störf:

Hefðbundin heimilisstörf, svo sem matseld og þrif.
Umönnun sjúkra, aldraðra og barna.
Viðhaldsverkefni og viðgerðir.
Hefðbundin garðyrkjustörf.

Undanskilin slysatryggingu við heimilisstörf eru meðal annars:

Slys sem einstaklingar verða fyrir við ýmsar daglegar athafnir sem ekki teljast til hefðbundinna heimilisstarfa svo sem að klæða sig, baða og borða.
Slys sem einstaklingar verða fyrir á ferðalögum, svo sem tjaldi, hjólhýsi og á hótelum.

Slys sem áttu sér stað fyrir 1. ágúst 2012:

Ný reglugerð um slysatryggingar við heimilisstörf nr. 670/2012 tók gildi 1. ágúst 2012.
Um slys sem áttu sér stað fyrir 1. ágúst 2012 gildir eldri reglugerð um slysatryggingar við heimilisstörf nr. 280/2005.