Slys við heimilisstörf

Þeir sem lenda í slysi við heimilisstörf geta átt rétt á bótum hafi þeir fyllt út viðeigandi reit á skattframtali.

Hak við slysatryggingu á skattframtali forsenda tryggingar

Til þess að njóta tryggingar þarf einstaklingur að hafa hakað við reitinn „slysatrygging við heimilisstörf“ á skattframtali.

Slysatryggingin gildir frá 1. júlí það ár sem skattframtali er skilað og gildir til 30. júní árið eftir. Ekki er unnt að óska eftir slysatryggingu við heimilisstörf eftir að skattyfirvöld hafa móttekið skattframtal.

Öll slys þarf að tilkynna innan eins árs.

Slysatryggingin nær til heimilisstarfa sem innt eru af hendi hér á landi:

  • Á heimili hins tryggða og í sumarbústað þar sem hinn tryggði dvelur.
  • Í bílskúr og geymslum við heimili hins tryggða eða sumarbústað þar sem hann dvelur.
  • Í afmörkuðum garði og innkeyrslu við heimili hins tryggða eða sumarbústað þar sem hann dvelur.

Til heimilisstarfa sem falla undir slysatryggingu teljast m.a. eftirtalin störf:

  • Hefðbundin heimilisstörf, svo sem matseld og þrif.
  • Umönnun sjúkra, aldraðra og barna.
  • Viðhaldsverkefni og viðgerðir.
  • Hefðbundin garðyrkjustörf.

Undanskilin slysatryggingu við heimilisstörf eru meðal annars:

  • Slys sem einstaklingar verða fyrir við ýmsar daglegar athafnir sem ekki teljast til hefðbundinna heimilisstarfa svo sem að klæða sig, baða og borða.
  • Slys sem einstaklingar verða fyrir á ferðalögum, svo sem tjaldi, hjólhýsi og á hótelum.

Hvaða gögnum þarf að skila inn til Sjúkratrygginga Íslands?

  • Tilkynningu um slys.
  • Læknisvottorði vegna slyss (áverkavottorð) frá þeim lækni eða heilbrigðisstofnun/sjúkrahúsi sem slasaði leitaði fyrst til eftir slysið. Í vottorðinu þurfa að koma fram upplýsingar um fyrstu komu vegna slyssins og tímabil óvinnufærni.
  • Kvittanir/reikninga vegna útlagðs sjúkrakostnaðar.

Ef um er að ræða vottorð frá Landspítala er óskað eftir vottorði meðferðarlæknis. Í vottorðinu þurfa að koma fram upplýsingar um fyrstu komu vegna slyssins og framhaldsmeðferð.

Að beiðni spítalans skal ennfremur bent á að áverkavottorð eru einungis afgreidd skv. beiðni í síma 543-1000. Óska þarf eftir sambandi við læknaritara þeirrar deildar þar sem sjúklingur var til meðferðar.

Reglugerð  

  • Ný reglugerð um slysatryggingar við heimilisstörf nr. 550/2017 tók gildi 6. júní 2017. Þá féll úr gildi eldri reglugerð nr. 670/2012.
Til baka

 


Language:

Þetta vefsvæði byggir á Eplica