Málsmeðferð umsókna
Eftir að umsókn berst afla Sjúkratryggingar Íslands allra gagna sem nauðsynleg eru til þess að afgreiða málið og tekur af því loknu afstöðu til bótaskyldu.
Umsóknir um bætur úr sjúklingatryggingu krefjast ítarlegrar skoðunar og umfangsmikillar gagnaöflunar. Að jafnaði má búast við að niðurstaða um bótaskyldu liggi fyrir innan sex til átta mánaða frá því að Sjúkratryggingar hafa aflað allra nauðsynlegra gagna. Ef mál eru sérstaklega flókin eða umfangsmikil eða erfiðlega gengur að afla gagna má þó búast við að málsmeðferðin taki lengri tíma.
Eftir að búið er að viðurkenna bótaskyldu í máli þarf sjúklingur að hafa samband við Sjúkratryggingar Íslands og óska eftir því að framkvæmt verði örorkumat. Að jafnaði má búast við því að ákvörðun um bótafjárhæð liggi fyrir um sex mánuðum eftir að sjúklingur óskar eftir því að hafist verði handa við örorkumat. Ekki er hægt að framkvæma örorkumat fyrr en ástand sjúklings er orðið stöðugt og ekki er að vænta frekari bata.
Kostnaður vegna aðstoðar lögmanns
Sjúklingi er í sjálfsvald sett hvort hann leitar aðstoðar lögmanns eða ekki en hann verður jafnan að bera kostnað af þeirri aðstoð sjálfur.
Lög um sjúklingatryggingu gera ekki ráð fyrir að umsækjandi þurfi lögmannsaðstoð, því greiða Sjúkratryggingar Íslands ekki lögmannskostnað.
Öll vinna við málið, svo sem gagnaöflun, mat á örorku, bótaútreikningur og fleira fer því fram innan Sjúkratrygginga Íslands. Því þarf sjúklingur við eðlilegar aðstæður ekki að leita aðstoðar lögmanns til að gæta hagsmuna sinna. Í þessu sambandi er rétt að benda á að könnun sem Sjúkratryggingar gerðu í ágúst 2006 leiddi í ljós að það að líkur á að mál verði samþykkt aukast ekki þó að sjúklingur ráði sér lögmann.
Ákvörðun Sjúkratrygginga um bótaskyldu og fjárhæð bóta má skjóta til úrskurðarnefndar almannatrygginga innan þriggja mánaða frá því að ákvörðun er tekin í málinu. Kærur eiga að berast beint til úrskurðarnefndarinnar, sem er til húsa að Hafnarhúsið við Tryggvagötu 17 101 Reykjavík.
