Nýtt greiðsluþátttökukerfi vegna kaupa á lyfjum 4. maí

Nýtt greiðsluþátttökukerfi vegna kaupa á lyfjum tók gildi 4. maí 2013 í samræmi við breytingar á lögum sem Alþingi samþykkti þann 1. júní 2012. Meginmarkmiðið með lögunum er að auka jafnræði milli einstaklinga óháð sjúkdómum og draga úr lyfjakostnaði þeirra sem þurfa að nota mikið af lyfjum.

Sanngjarnara kerfi - aukið jafnræði

Það sem einkennir eldra greiðsluþátttökukerfi er að kostnaður þeirra sem nota lyf að staðaldri og þurfa jafnvel á mörgum lyfjum að halda, getur orðið mjög hár vegna þess að ekki er hámark á lyfjakostnaði einstaklinga. Þá er greiðsluþátttaka Sjúkratrygginga Íslands (SÍ) mismikil eftir lyfjaflokkum sem skapar ójafnræði milli einstaklinga með mismunandi sjúkdóma.

Ávinningur nýja kerfisins er meðal annars:

  • Jafnræði einstaklinga eykst.
  • Komið er til móts við þá sem hafa mikil útgjöld vegna lyfja.
  • Kerfið er einfaldara en eldra kerfi.

Þrepaskipt greiðsluþátttaka

Greiðsluþátttökukerfið byggir á þrepaskiptri greiðsluþátttöku þar sem hver einstaklingur greiðir hlutfallslega minna eftir því sem lyfjakostnaður hans eykst innan tólf mánaða tímabils. Í fyrsta þrepi greiðir einstaklingurinn lyf að fullu, í öðru þrepi greiðir hann 15% af verði lyfja og í þriðja þrepi greiðir hann 7,5%. Þegar lyfjakostnaður hefur náð ákveðnu hámarki fær hann lyf að fullu greidd af sjúkratryggingum það sem eftir er af tímabilinu.

Öll lyf sem SÍ taka þátt í að greiða (þar með talin lyf sem einstaklingur hefur fengið samþykkt lyfjaskírteini fyrir) verða felld inn í greiðsluþrepin. Þau lyf sem SÍ taka ekki þátt í að greiða, falla utan greiðsluþrepanna.

Þeir sem hafa haft mikinn lyfjakostnað greiða því almennt minna fyrir lyf í nýju kerfi. Þeir sem þurfa sjaldan að kaupa lyf munu almennt greiða meira en áður.

Tólf mánaða greiðslutímabilið hefst við fyrstu lyfjakaup einstaklingsins. Ef hann kaupir t.d. lyf í fyrsta sinn 15. maí 2013 þá lýkur tímabilinu 15. maí 2014. Nýtt tímabil hefst þegar viðkomandi kaupir lyf í fyrsta sinn eftir að framangreindu tímabili lýkur.

Áður niðurgreidd lyf falla inn í kerfið

Lyf sem ekki hefur verið greitt fyrir í eldra kerfi eru lyf sem hafa svokallaða stjörnumerkingu í lyfjaverðskrá t.d. glákulyf og sykursýkislyf. Einnig hafa einstaklingar með parkinson, flogaveiki og Sjögren ekki greitt fyrir lyf sín ef þeir hafa fengið útgefið lyfjaskírteini. Þessi lyf verða felld inn í kerfið og einstaklingar taka þátt í kostnaði þeirra.

Lyfjareiknivél reiknar út lyfjakostnað

Sett hefur verið fram Lyfjareiknivél hér á vef SÍ. Í henni er hægt að reikna út lyfjakostnað út frá gefnum forsendum. Þeir sem vilja skoða hvernig lyfjakostnaður þróast í nýju kerfi eru hvattir til að kynna sér reiknivélina.

Skoðaðu stöðu lyfjakaupa í Réttindagátt

í Réttindagátt - mínar síður er hægt að sjá yfirlit yfir lyfjakaup og þrepastöðu. Innskráning fer fram með íslykli eða rafrænum skilríkjum.Þegar innskráningu er lokið smellið á flokkinn "Réttindastaðan mín" og síðan "Lyfjakaup - þrepastaða". Sjá leiðbeiningar.

Til baka

 


Language:

Þetta vefsvæði byggir á Eplica