Læknismeðferð erlendis

Sjúkratryggingum Íslands er heimilt að greiða fyrir læknismeðferð á sjúkrahúsi erlendis. Sá læknir sem hefur viðkomandi sjúkling til meðferðar hér á landi sækir að jafnaði um styrk til Sjúkratrygginga Íslands.

Sérfræðihópur metur hvort skilyrði um læknismeðferð erlendis séu uppfyllt og hefur hópurinn verið kallaður „siglinganefnd“. Hópurinn er skipaður 5 sérfræðilæknum og lögfræðingi. Tryggingalæknir er formaður nefndarinnar.

Eftirtalin skilyrði verða að vera uppfyllt til að Sjúkratryggingum Íslands sé heimilt að samþykkja greiðslu vegna læknismeðferðar erlendis:

að um brýna nauðsyn á læknismeðferð sé að ræða
að læknismeðferðin sé viðurkennd
að ekki sé unnt að veita nauðsynlega hjálp hér á landi

Nefndin fundar einu sinni í mánuði. Umsókn þarf að liggja fyrir svo að nefndin geti tekið afstöðu til þess hvort greiðsla fyrir læknismeðferð erlendis skuli samþykkt.

Í stað þess að sjúklingur fari í meðferð erlendis geta Sjúkratryggingar Íslands ákveðið að sérgreinalæknar sem starfa erlendis veiti sjúklingi meðferð á sjúkrahúsi hér á landi ef öll nauðsynleg skilyrði eru uppfyllt.

Frekari upplýsingar

Sjúkratryggingar Íslands greiða fargjald sjúklings frá Íslandi og til þess staðar sem meðferð er fyrirhuguð og til baka aftur. Einnig er endurgreitt fargjald innanlands samkvæmt reglum um ferðakostnað.
Ef sjúklingur er yngri en 18 ára skal greiða ferðastyrk fyrir báða foreldra eða tvo nánustu aðstandendur eftir því sem við á.
Sjúkratryggingar Íslands greiða dagpeninga vegna nauðsynlegs uppihaldskostnaðar sjúklings utan sjúkrastofnunar svo og uppihaldskostnaðar fylgdarmanns eða fylgdarmanna. Ef um börn er að ræða greiða Sjúkratryggingar Íslands dagpeninga að fullu til annars foreldris en að hálfu til hins. Börn yngri en fjögurra ára fá fjórðung af dagpeningum en þau sem eru á aldrinum fjögurra til ellefu ára fá hálfa dagpeninga.
Heimilt er að taka þátt í kostnaði vegna tæknifrjóvgunar para ef ekki er hægt að veita fullnægjandi meðferð hér á landi. Pör taka þátt í kostnaði við meðferð á sama hátt og tæknifrjóvgun hafi farið fram á Íslandi en að öðru leyti fer greiðsluþátttaka eftir reglugerð. Greiddir eru fullir dagpeningar fyrir annan makann en hálfir fyrir hinn meðan dvalist er utan sjúkrahúss.
Ef valin er meðferð á öðrum og dýrari stað en siglinganefnd hefur samþykkt greiða Sjúkratryggingar Íslands eingöngu þann kostnað sem henni hefði borið að greiða fyrir sambærilega þjónustu á ódýrari staðnum.
Ef aðstæður eru þannig að heilbrigðisstarfsmaður þarf að fylgja sjúklingi greiða Sjúkratryggingar Íslands ferðastyrk til hans.
Heimilt er að ákveða að sérgreinalæknar sem starfa erlendis veiti sjúklingi meðferð á sjúkrahúsi hér á landi.