Flutningur til Íslands

Allir sem hafa verið búsettir hér á landi í sex mánuði teljast sjúkratryggðir af hinu opinbera. Þeir hafa því rétt á niðurgreiðslu af heilbrigðisþjónustu. Þeir sem flytja til Íslands þurfa að tilkynna lögheimilisflutning til Þjóðskrár.

Þeir einstaklingar sem flytja á milli landa bera ábyrgð á því að skráning þeirra sé rétt hjá viðkomandi yfirvöldum.

Einnig þarf sá sem hingað flytur að tilkynna um skráningu í tryggingaskrá.

Flutningur frá Norðurlöndum

Þegar flutt er til Íslands frá Norðurlöndunum þarf að skila inn E104 vottorðinu (sjá fyrir neðan) og getur viðkomandi þá orðið sjúkratryggður frá komudegi í Þjóðskrá.

Hafir þú búið á öðru Norðurlandi í styttra en eitt ár er hægt að sækja um undanþágu frá því að skila inn E104 vottorði.

Gagnlegar upplýsingar um flutninga milli Norðurlanda má finna á vefsíðunni Hallo Norden og norrænni vefgátt um almannatryggingar: Nordic Social Insurance Portal.

Flutningur frá EES landi

Með skráningu í tryggingaskrá þarf að berast viðeigandi E-vottorð frá tryggingastofnunum í öðru EES landi:

E-104	Vottorð um staðfestingu á tryggingar- og starfstímabilum í öðru EES landi Vottorð um söfnun tryggingar-, starfs- eða búsetutímabila. Unnt er að óska eftir að sex mánaða biðtíminn verði styttur eða felldur niður með því að framvísa E104. Vottorðið staðfestir tryggingu í fyrra heimalandi og er gefið út af tryggingastofnun þar. Fyrir þá sem flytja varanlega til Íslands eða byrja að vinna á Íslandi.
E-101	Vottorð um hvaða löggjöf skuli gilda. Staðfesting á tryggingavernd erlendis. Fyrir þá sem vinna (tímabundið) á Íslandi, en eru áfram tryggðir skv. tryggingarlöggjöf í öðru EES landi, til dæmis útsendir starfsmenn frá EES landi.
E-106	Vottorð um rétt til aðstoðar vegna veikinda meðgöngu og fæðingar handa þeim sem búa í öðru landi en lögbæru landi. Sjúkratryggingavottorð fyrir þá sem taka upp búsetu á Íslandi en eru áfram skráðir hjá sjúkratryggingum í öðru EES landi.
E-109	Skráningarvottorð fyrir aðstandendur launþega eða sjálfstætt starfandi einstaklings. Sjúkratryggingavottorð fyrir þá sem taka upp búsetu á Íslandi en eru áfram skráðir hjá sjúkratryggingum í öðru EES landi, sem fjölskyldumeðlimir launþega eða lífeyrisþega.
E-121	Skráningarvottorð lífeyrisþega. Sjúkratryggingavottorð fyrir þá sem eru lífeyrisþegar í öðru EES landi, en taka upp búsetu á Íslandi.