Húðsjúkdómar

Sjúkratryggðir einstaklingar eiga rétt á styrk vegna nauðsynlegrar meðferðar við húðsjúkdómi sem er veitt af öðrum en læknum en samkvæmt fyrirmælum læknis. 

Meðferðin verður að fara fram hjá rekstraraðila sem hlotið hefur staðfestingu landlæknis og starfar samkvæmt samningi við heilbrigðisráðuneyti.

Sjúkratryggingar greiða 80% af kostnaði við meðferð húðsjúkdóma sem felst í B-geislum og/eða B- og A-geislum, með eða án smyrsla og 90% af kostnaði við meðferð húðsjúkdóma sem felst í PUVA-meðferð.

Meðferð vegna psoriasis og exems

Sjúkratryggingar greiða kostnað vegna psoriasis og exemsjúklinga sem þurfa að leita læknishjálpar á meðferðarstofnunum sem kemur í stað sjúkrahúsvistar.  

Sjúklingar borga sjálfir kostnað við ferðir vegna meðferðar. 

Greiðsluþátttaka takmarkast við allt að 23 skipti hjá hverjum sjúklingi á meðferðartímabili. 

Sjúkratryggingar Íslands eru með samning við Bláa Lónið um þessa meðferð.

Læknir verður að hafa metið meðferðarþörfina sem hefur líka verið staðfest af húðlækni þess aðila sem veitir meðferðina (húðlæknir Bláa lónsins).

Ef meðferð hér á landi ber ekki árangur og sjúklingur þarf nauðsynlega að vistast á erlendu sjúkrahúsi eða meðferðastofnun er hægt að sækja um greiðsluþátttöku til Sjúkratrygginga Íslands.

 


 


Language:

Þetta vefsvæði byggir á Eplica