Sérfræðilæknar

Rafræn sending reikninga
Til að tryggja hag sjúklinga og valda þeim sem minnstum óþægindum er sérgreinalæknum gefinn kostur á að senda reikninga sína á rafrænan hátt til SÍ.  Ef læknar senda reikninga sína á þennan hátt greiða sjúklingar einungis sinn hluta af reikningunum og þurfa ekki að óska eftir endurgreiðslu hjá SÍ.  Með rafrænum skilum og sömu verðskrá og áður eiga sjúklingar ekki að þurfa að verða varir við samningsleysið.

Endurgreiðsla reikninga hjá SÍ
Ef sjúkratryggður þarf að greiða fyrir þjónustu sérgreinalæknis að fullu getur hann óskað eftir endurgreiðslu hjá SÍ.  Umsóknareyðublað má finna hér.  Umsóknareyðublað, ásamt frumriti reiknings og staðfestingu á greiðslu hans, skal sent til Sjúkratrygginga Íslands, Laugavegi 114-118, 150 Reykjavík.  Einnig geta sjúkratryggðir snúið sér til þjónustumiðstöðvar að Laugavegi 114 eða til umboða sem eru hjá sýslumönnum um land allt.  Allar umsóknir um endurgreiðslu verða afgreiddar svo fljótt sem kostur er.  Þegar umsókn hefur verið afgreidd og sett skilyrði staðfest mun greiðsla verða innt af hendi í upphafi næsta mánaðar. Unnt er að skoða yfirlit innsendra reikninga til SÍ í Réttindagátt - mínar síður einstaklinga.

Sjá einnig upplýsingar á vefsíðu velferðarráðuneytisins.

Ítarefni

Heimild til endurgreiðslu 

Í lögum um sjúkratryggingar nr. 112/2008 segir að sjúkratryggingar taki til nauðsynlegra rannsókna og meðferðar hjá sérgreinalæknum sem samið hefur verið um.  Jafnframt segir að ef samningar séu ekki fyrir hendi sé í sérstökum tilfellum heimilt tímabundið að endurgreiða sjúkratryggðum útlagðan kostnað vegna heilbrigðisþjónstu á grundvelli gjaldskrár sem SÍ gefa út.  Velferðarráðherra setur í slíkum tilvikum reglugerð um framkvæmd, m.a. um tímalengd heimildarinnar og skilyrði fyrir endurgreiðslu.