Ferðakostnaður

Sjúkratryggðir einstaklingar geta átt rétt á greiðslu ferðakostnaðar vegna sjúkdómsmeðferða sé viðeigandi þjónusta ekki í boði á heimaslóðum, að uppfylltum skilyrðum reglugerðar nr. 871/2004 um ferðakostnað sjúklinga innanlands.

Þetta á við um ferðakostnað vegna tveggja ferða til læknismeðferðar á hverju tólf mánaða tímabili eða vegna ítrekaðra ferða.

Ferðakostnaður er til dæmis greiddur vegna langra ferða, ítrekaðra ferða, ferða heim eftir sjúkraflutning, ferðir foreldra eða nánasta aðstandanda að sækja viðurkennd fræðslunámskeið og vegna bráðatilvika. Þú getur lesið meira um þær ferðir sem Sjúkratryggingar taka þátt í að borga fyrir hér.

Hvernig sæki ég um endurgreiðslu?

Sótt er um greiðsluþátttöku áður en ferð er farin, nema um bráðatilvik sé að ræða.

  • Læknir heima í héraði sækir um ferðakostnaðinn á þar til gerðu eyðublaði. Senda þarf eyðublaðið til umboða á landsbyggðinni sem áframsenda það til Sjúkratrygginga Íslands ef við á. Það eru því engin gögn send beint til Sjúkratrygginga Íslands, heldur skal leita til umboða.
  • Sjúklingur eða forráðamaður hans þarf síðan að skila inn til síns umboðs staðfestingu á komu til læknis frá þeim sérfræðingi sem farið var til og kvittunum fyrir fargjaldi.

Við bendum öllum á að lesa vel þær upplýsingar um endurgreiðslur ferðakostnaðar sem eru hér á vefsíðunni áður en sótt er um.

Nauðsynleg gögn

  • Staðfesting læknis á því að vísa hafi þurft sjúklingi til meðferðar utan héraðs þar sem þjónustan er ekki fyrir hendi í heimahéraði. Þá fyllir læknir út eyðublaðið „Staðfesting á nauðsynlegri ferð sjúklings utan heimahéraðs“. Ef ástand viðkomandi er alvarlegt og fellur undir heimild til ítrekaðra ferða þá er notað eyðublaðið „Skýrsla vegna ferðakostnaðar sjúklings innanlands“.
  • Sjúklingar þurfa alltaf að framvísa „Staðfestingu á komu til læknis“ frá sérfræðingnum/meðferðaraðilanum þegar það vitjar endurgreiðslu ásamt kvittunum fyrir fargjaldi. Framvísa þarf farseðlum ef ferð er farin með flugi, ferju, áætlunarbíl eða öðrum almenningsfarartækjum. Hið sama gildir um kvittanir fyrir greiðslu annars kostnaðar, þar á meðal vegna leigu á bifreið, leigubifreiða og fyrir greiðslu vegtolla. Sjúkratryggingar Íslands geta jafnframt beðið umsækjanda um kvittanir fyrir eldsneyti sé eigin bifreið notuð.

Hversu mikið er greitt?

Sjúkratryggingar Íslands endurgreiða 2/3 hluta kostnaðar af fargjaldi með áætlunarferð eða ef eigin bifreið er notuð 2/3 hluta kostnaðar. Gildandi kílómetragjald

Greiðsluhluti sjúklings er þó aldrei hærri en 1.500 krónur fyrir hverja ferð.

Ef hluti sjúklings fer yfir 10.000 krónur á 12 mánaða tímabili skal greiðsluhluti hans aldrei verða hærri en 500 krónur í hverri ferð það sem eftir er tímabilsins.

Sé um áætlunarferð að ræða greiða Sjúkratryggingar Íslands fargjald fylgdarmanns ef sjúklingur er yngri en 18 ára eða ekki fær um að ferðast á eigin vegum. Greiðsluhluti sjúklings í samanlögðum kostnaði vegna ferðar sjúklings og fylgdarmanns er aldrei hærri en 1.500 krónur.

Sé um stuttar og ítrekaðar ferðir að ræða vegna alvarlegra sjúkdóma endurgreiða Sjúkratryggingar Íslands 3/4 hluta ferðakostnaðar með leigubifreið ef sjúklingur er ekki fær um að ferðast með áætlunarbifreið eða strætisvagni þó vegalengd sé skemmri en 20 kílómetrar.

Ef eigin bifreið er notuð í slíkum tilvikum endurgreiða SÍ 2/3 hluta kostnaðarins miðað við 31,34 krónur á hvern ekinn kílómetra.  

Upphæð kílómetragjalds hækkar/lækkar í hlutfalli við akstursgjald ríkisstarfsmanna eins og það birtist í auglýsingum ferðakostnaðarnefndar og tekur því breytingum reglulega.


Til baka

 


Language:

Þetta vefsvæði byggir á Eplica