Fréttabréf Sjúkratrygginga Íslands - 5. tölublað

Sjúkratryggingar Íslands veita upplýsingar um réttindastöðu sjúklinga rafrænt

 - Þjónustugáttir SÍ og rafræn tenging við veitendur heilbrigðisþjónustu

Sjúkratryggingar Íslands (SÍ) hafa nýlega hafið rafræna miðlun upplýsinga um réttindastöðu sjúklinga til almennings og veitenda heilbrigðisþjónustu (t.d. lækna og apóteka) bæði í gegnum þjónustugáttir stofnunarinnar og með rafrænni tengingu.

 

Þetta þýðir að veitendur heilbrigðisþjónustu geta nú nálgast rafrænt upplýsingar til að ákvarða rétta kostnaðarþátttöku sjúklinga án frekari staðfestinga eða framvísunar á afsláttarskírteinum. Á sama tíma getur almenningur skoðað rafrænt eigin réttindi, sótt afsláttarkort og skoðað reikningsyfirlit og endurgreiðslur vegna heilbrigðisþjónustu.

Réttindastaða gagnvart læknisþjónustu

Miðlun til heilbrigðisstofnana og læknastöðva

Upplýsingar um réttindastöðu vegna læknisþjónustu er miðlað með tvennum hætti til heilbrigðisstofnana og læknastöðva:

  • Með beinum rafrænum samskiptum við upplýsingakerfi heilbrigðisstofnana og læknastöðva.
  • Í gegnum þjónustusíðu SÍ fyrir veitendur heilbrigðisþjónustu, Gagnagátt (mínar síður rekstraraðila) á www.sjukra.is.

Uppfletting á réttindastöðu er þrennskonar:

  • Hvort sjúklingur sé sjúkratryggður eða ekki.
  • Hvort sjúklingur greiðir sem öryrki, sem ellilífeyrisþegi osfrv.
  • Hvort sjúklingur sé með afsláttarkort.

Sjúklingur greiðir því ávallt verð miðað við þá greiðsluþátttöku sem hann á rétt á og þarf því ekki að framvísa t.d. afsláttarkorti frá SÍ eða örorkukorti frá TR.

Fyrstu þjónustuaðilarnir tengjast

Nú þegar er ofangreind tenging við kerfi veitenda heilbrigðisþjónustu komin á við allar heilsugæslustöðvar á höfuðborgarsvæðinu, auk Heilbrigðisstofnunar Suðurlands og Domus Medica. Fleiri aðilar tengjast á næstunni. Önnur leið fyrir aðila í heilbrigðisþjónustu til að fletta upp réttindastöðunni er að tengjast ofangreindri Gagnagátt sem krefst innskráningar á lokað svæði á vefnum www.sjukra.is og miðlar lykilorði í netbanka. Aðilar eins og Læknasetrið í Mjódd, Læknisfræðileg myndgreining, Læknavaktin og fleiri hafa hafið notkun á gáttinni og er stofnunin nú að kynna hana fyrir fleiri aðilum í heilbrigðisþjónustu.

Réttindastaða gagnvart kaupum á lyfjum

43 apótek tengd

Rafrænni tengingu hefur verið komið á við afgreiðslukerfi 43ja apóteka af þeim 63 sem starfrækt eru á landinu og er áætlað að síðustu apótekin tengist fyrir árslok.  Þau sem eru nú tengd og miðlað er réttindastöðu til eru öll útibú Lyfju, Lyfja og heilsu, og útibú Lyfjavers. 

SÍ sendir apótekum svipaðar upplýsingar og aðilum í læknisþjónustu þ.e. upplýsingar um sjúkratryggingu, stöðu eins og öryrki, ellilífeyrisþegi osfrv. en einnig hvort einstaklingur sé með lyfjaskírteini sem gefur aukinn afslátt af einstökum lyfjum.

Rétt eins og gagnvart læknisþjónustu greiðir einstaklingur ávallt verð miðað við þá greiðsluþátttöku sem hann á rétt á og þarf því ekki að framvísa neinum afsláttarskírteinum.

Réttindagátt miðlar réttindastöðu til einstaklinga

Rétt eins og veitendur heilbrigðisþjónustu geta sjúklingar fengið upplýsingar um sína eigin réttindastöðu í gegnum Réttindagátt (mínar síður einstaklinga) á www.sjukra.is. Í gáttinni er einnig hægt að sjá stöðu og prenta út afsláttarkort og lyfjaskírteini en einnig skoða reikninga sem greiddir hafa verið vegna heilbrigðisþjónustu sem og mögulegar endurgreiðslur á kostnaði. Innskráning fer fram með veflykli skattyfirvalda eða rafrænum skilríkjum.

Hver er ávinningurinn?

 Ávinningur af rafrænni miðlun réttindastöðu er margháttaður:

  1. Óþarfi er fyrir sjúkling að hafa með sér afsláttarskírteini til að sýna fram á aukin réttindi til heilbrigðisþjónustu. Þetta sparar sjúklingum sporin og möguleg viðvik t.d. að sækja sér afsláttarkort, sækja endurgreiðslu ef afsláttarkort gleymist osfrv.
  2. Reikningagerð og uppgjör aðila í heilbrigðisþjónustu verður nákvæmari og minni hætta er á villum og leiðréttingum.
  3. Að sama skapi verður umsýsla SÍ við að sannreyna reikninga og uppgjör við aðila í heilbrigðisþjónustu, minni, réttari og öruggari og hægt verður að veita almenningi og veitendum heilbrigðisþjónustu betri þjónustu.

Allt þetta leiðir til þess að viðskiptakostnaður í kerfinu lækkar og hagkvæmni eykst hjá öllum ofangreindum aðilum.

Veitendur heilbrigðisþjónustu hvattir til að tengjast

Veitendur heilbrigðisþjónustu eru hvattir til að notfæra sér þjónustu SÍ, hvort sem þjónustuaðilar vilja sækja um tengingu við kerfin eða byrja strax að nota uppflettingu með því að skrá sig inn í Gagnagátt og nota hana við uppflettingu. Upplýsingar um aðgang í Gagnagáttina má finna undir Þjónustugáttir SÍ á forsíðu www.sjukra.is. Einnig er hægt að hafa samband við SÍ í síma 515-0070 eða með tölvupósti á gatt@sjukra.is til að fá upplýsingar.

Sjúkratryggingar Íslands  eru um þessar mundir að kynna þessa bættu þjónustu og bindur miklar vonir við að þjónustan nái útbreiðslu meðal almennings og veitenda heilbrigðisþjónustu.  Miðlun á réttindastöðu sjúklinga er öllum aðilum til hagsbóta í formi hagræðingar fyrir sjúklinga, veitendur heilbrigðisþjónustu og ríkisreksturinn. 

Til baka

 


Language:

Þetta vefsvæði byggir á Eplica